🚩आषाढी एकादशीनिमित्त हार्दिक शुभेच्छा 🚩 आषाढी एकादशीचे औचित्य साधून श्रीमती सुनितीदेवी सिंघानिया शाळेमध्ये अत्यंत उत्साहात आणि भक्तीमय वातावरणात 'शालेय दिंडी सोहळा' साजरा करण्यात आला. सर्वप्रथम शाळेच्या मुख्याध्यापिका लक्ष्मी मधुसूदन मॅडम यांच्या हस्ते विठ्ठल-रखुमाईच्या मूर्तीचे आणि पालखीचे पूजन करण्यात आले. 'ज्ञानोबा माऊली तुकाराम' आणि 'विठ्ठल विठ्ठल जय हरी विठ्ठल' अशा जयघोषात दिंडीला सुरुवात झाली. विद्यार्थ्यांनी पालखीभोवती गोल रिंगण करून पारंपारिक फुगड्या खेळल्या आणि भजनांवर ठेका धरला. अभंग आणि टाळांच्या आवाजाने संपूर्ण शाळा परिसर दुमदुमून गेला होता. महाराष्ट्राची ही गौरवशाली सांस्कृतिक परंपरा लहान वयातच विद्यार्थ्यांना समजावी आणि त्यांच्यावर सुसंस्कार व्हावेत, या उद्देशाने या विशेष कार्यक्रमाचे आयोजन करण्यात आले होते. या सोहळ्याचे मुख्य आकर्षण म्हणजे वारकऱ्यांच्या वेशभूषेत आलेले लहान बालगोपाळ होते. विद्यार्थ्यांनी डोक्यावर पांढरी टोपी, कपाळावर बुक्का-चंदन, गळ्यात तुळशीची माळ आणि हातात टाळ-चिपळ्या घेतल्या होत्या. विद्यार्थिनींनी नऊवारी साड्या नेसून, डोक्यावर तुळशीची वृंदावने घेऊन दिंडीत सहभाग घेतला. शाळेतील दोन विद्यार्थ्यांनी विठ्ठल आणि रखुमाईचे हुबेहूब रूप साकारले होते. संतांनी दिलेली समता, बंधुभाव आणि पर्यावरणाची शिकवण आजच्या काळात किती महत्त्वाची आहे, याचे प्रबोधन दिंडीद्वारे करण्यात आले. या सोहळ्यामुळे विद्यार्थ्यांमध्ये प्रचंड आनंद आणि भक्तीचे वातावरण पाहायला मिळाले.